Молитва Господу Богу

Бо́же, очи́сти мя, гре́шнаго, и поми́луй мя, и прости́ ми, Го́споди Бо́же, Спа́се Ми́лостивый! Даждь ми, Го́споди, христиа́нский коне́ц с Пречи́стым Те́лом и с Честно́ю Кро́вию, со слеза́ми и покая́нием. Изба́ви, Го́споди, му́ки ве́чныя, огня́ негаси́маго, и че́рвия неусыпа́ющаго, и смолы́ кипя́щия. Го́споди, Ты созда́л мя еси́, Го́споди, Ты поми́луй. Го́споди, Твое́ есмь созда́ние. Ами́нь.

Молитвы Пресвятой Богородице

Пречи́стая Госпоже́ Ми́лостивая, Цари́це Небе́сная, помоли́ся Го́споду Бо́гу и Спа́су на́шему Иису́су Христу́, Сы́ну Твоему́, за мене́, гре́шнаго раба́ Твоего́ (имя). Даждь ми, Госпоже́, христиа́нский коне́ц с Пречи́стым Те́лом и с Честно́ю Кро́вию и со слеза́ми и покая́нием. Изба́ви, Госпоже́, му́ки ве́чныя, огня́ неугаси́маго, и че́рвия неусыпа́ющаго, и смолы́ кипя́щия. Пречи́стая Госпоже́, Ми́лостивая Цари́це Небе́сная, Ты еси́ Моле́бница ко Го́споду Бо́гу и Спа́су на́шему Иису́су Христу́ за мене́, гре́шнаго и окая́ннаго раба́ Твоего́ (имя). Ты еси́ Помо́щница, Ты Засту́пница от вся́каго зла и сопоста́та, не забу́ди, Пречи́стая Госпоже́, ни́щаго Твоего́ до конца́.

Молитва по вся дни

Душе́, душе́ моя́, почто́ жа́луешися на Го́спода? Я́ко ле́ность твоя́ ве́чней му́це хода́тай есть. А́ще бы ве́дала дар Бо́жий, пла́кала бы ся горя́щими слеза́ми, стена́ющи со воздыха́нием, скорбя́щи о вся́ком гресе́, о ма́лем и о вели́цем. Возопи́й ко Своему́ Влады́це, да не предвари́т тебе́ я́рость одержа́щаго всеси́льною руко́ю пра́ведною. Аз же, гре́шный и лени́вый и льсти́вый язы́к име́яй, ка́ко помолю́ся Влады́це моему́, да изба́вит мя Госпо́дь от Стра́шнаго Суда́? Всегда́ бо трепе́щу по́мыслом в се́рдцы мое́м о Стра́шнем Суде́, да изба́вит мя от му́ки ве́чныя, и че́рвия неусыпа́ющаго, и тьмы кроме́шныя, и от грозы́ несогре́емыя. Поми́луй мя, гре́шнаго раба́ Твоего́ (имя), я́ко Па́вла апо́стола, его́же любля́ше па́че всех, и от нас, убо́гих, не отврати́ лица́ Твоего́ во он День Стра́шный, его́же трепе́щет душа́ моя́ и соста́вы те́ла моего́ ужаса́ются. Го́споди, изба́ви мя стра́шнаго часа́, да не отпаду́ от ми́лости Твоея́. Но молю́ святы́я А́нгелы и Арха́нгелы, и проро́ки, и му́ченики, и вся святы́я, да мо́лят Бо́га за мою́ ду́шу. Ва́шего ра́ди моле́ния да возврати́т Влады́ка тре́бы Своя́ от мене́, гре́шнаго. И ты, Пречи́стая Госпоже́ Де́во, иму́щи дерзнове́ние к Сы́ну о рабе́х Твои́х, не забу́ди трудо́в раба́ Твоего́ (имя). Влады́ко Спа́се, от убо́гия души́ Тебе́ молю́ся, изба́ви мя от печа́ли грехо́в мои́х и введи́ в ра́дость безконе́чнаго жития́, иде́же прославля́ется всесвято́е и́мя Твое́, Отца́ и Сы́на и Свята́го Ду́ха, всегда́, ны́не, и при́сно, и во ве́ки веко́в. Ами́нь.

Источник: Преподобный Александр Свирский и его ученики / [сост. Л. А. Ильюнина]. – Санкт-Петербург : Свято-Троицкий Александра Свирского мужской мон., 2011. – 382 с. / Молитвы преподобного Александра Свирского. 379–382 с. ISBN 978–5-98361–145–0