Преподобной Афанасии игуменье

Тропарь, глас 8

В тебе́ ма́ти, изве́стно спасе́ся е́же по о́бразу, прии́мши бо кре́ст, после́довала еси́ Христу́, и де́ющи учи́ла еси́ презира́ти у́бо пло́ть, прехо́дит бо: прилежа́ти же о души́ ве́щи безсме́ртней, те́мже и со а́нгелы сра́дуется преподо́бная Афана́сия, ду́х тво́й.

Кондак, глас 2

За любо́вь Госпо́дню преподо́бная, поко́я жела́ние возненави́дела еси́, поще́нием ду́х тво́й просвети́вши, кре́пко бо зве́ри победи́ла еси́: но моли́твами твои́ми проти́вных шата́ние разори́.