Молитва Архистратигу Михаилу

Святы́й и вели́кий Арха́нгеле Бо́жий Михаи́ле, неисповеди́мыя и пресу́щественныя Тро́ицы пе́рвый во А́нгелех предстоя́телю, ро́да же челове́ческаго приста́вниче и храни́телю, сокруши́вый с во́инствы свои́ми главу́ прего́рдаго денни́цы на небеси́ и посрамля́яй вы́ну зло́бу и кова́рства его́ на земли́! К тебе́ прибега́ем с ве́рою и тебе́ мо́лимся с любо́вию: бу́ди щит несокруши́м и забра́ло тве́рдо Святе́й Це́ркви и Правосла́вному Оте́чествию на́шему, огражда́я их молниено́сным мече́м твои́м от всех враг, ви́димых и неви́димых. Бу́ди А́нгел Храни́тель, прему́др светода́тель и споспе́шник и́мже во вла́сти суть. Бу́ди вождь и сора́тай непобеди́м христолюби́вому во́инству на́шему, венча́я его сла́вою и побе́дами над супоста́ты, да позна́ют вси противля́ющиися нам, яко с на́ми Бог и свя́тии А́нгели Его. Не оста́ви же, о Арха́нгеле Бо́жий, по́мощию и заступле́нием твои́м и нас, прославля́ющих днесь свято́е и́мя твое́: се бо, а́ще и многогре́шни есмы́, оба́че не хо́щем в беззако́ниих на́ших поги́бнути, но е́же обрати́тися ко Го́споду и оживле́нным бы́ти от Него́ на дела́ блага́я. Озари́ ум наш све́том Бо́жиим, и́же вы́ну сия́ет на молниеви́дном челе́ твое́м, да возмо́жем разуме́ти, что есть во́ля Бо́жия о нас, блага́я и соверше́нная, и ве́дети вся, я́же подоба́ет нам твори́ти и я́же презира́ти и оставля́ти. Укрепи́ благода́тию Госпо́днею сла́бую во́лю и немощно́е произволе́ние на́ше, да, утверди́вшеся в зако́не Госпо́днем, преста́нем про́чее вла́ятися земны́ми по́мыслы и похоте́ньми пло́ти, увлека́ющеся по подо́бию несмысле́нных дете́й скороги́бнущими красо́тами ми́ра сего́, я́ко ра́ди тле́ннаго и земна́го безу́мне забыва́ти ве́чная и небе́сная. Над все́ми же си́ми испроси́ нам свы́ше дух и́стиннаго покая́ния, нелицеме́рную печа́ль по Бо́зе и сокруше́ние о гресе́х на́ших, да остаю́щее нам число́ дней вре́меннаго живота́ на́шего иждиве́м не во угожде́нии чу́вств и рабо́те страсте́м на́шим, но во изглажде́нии зол, соде́янных на́ми, слеза́ми ве́ры и сокруше́ния серде́чнаго, по́двигами чистоты́ и святы́ми дела́ми милосе́рдия. Егда́ же прибли́зится час сконча́ния на́шего и свобожде́ния от уз бре́ннаго сего́ телесе́, не оста́ви нас, Арха́нгеле Бо́жий, беззащи́тных проти́ву духо́в зло́бы поднебе́сных, обы́кших прегражда́ти души́ челове́честей восхо́д в го́рняя, да, охраня́еми тобо́ю, безпреткнове́нно дости́гнем о́ных пресла́вных селе́ний ра́йских, иде́же не́сть печа́ль, ни воздыха́ние, но жизнь безконе́чная, и, сподо́бльшеся узре́ти пресве́тлое лице́ Всеблага́го Го́спода и Влады́ки на́шего, па́дше со слеза́ми у ногу́ Его́, в ра́дости и умиле́нии воскли́кнем: сла́ва Тебе́, дража́йший Искупи́телю наш, И́же за премно́гую любо́вь Твою́ к нам, недосто́йным, благоволи́л еси́ посла́ти А́нгелы Твоя́ в служе́ние спасе́нию на́шему. Ами́нь.

Молитва святому благоверному великому князю Александру Невскому, в иноках Алексию

Ско́рый помо́щниче все́х усе́рдно к тебе́ прибега́ющих и те́плый на́ш пред Го́сподом предста́телю, святы́й благове́рный вели́кий кня́же Александре! При́зри ми́лостиво на ны, недосто́йныя, мно́гими беззако́нии непотре́бна себе́ сотво́ршия, к ра́це моще́й твои́х (или: к ико́не твое́й) ны́не притека́ющия и из глубины́ се́рдца к тебе́ взыва́ющия: ты́ в житии́ твое́м ревни́тель и защи́тник Правосла́вныя ве́ры бы́л еси́: и на́с в не́й те́плыми твои́ми к Бо́гу моли́твами непоколеби́мы утверди́. Ты́ вели́кое возложе́нное на тя́ служе́ние тща́тельно проходи́л еси́: и на́с твое́ю по́мощию пребыва́ти коего́ждо, в не́же при́зван е́сть, наста́ви. Ты́, победи́в полки́ супоста́тов, от преде́лов Росси́йских о́ных отгна́л еси́, и на на́с ополча́ющихся все́х ви́димых и неви́димых враго́в низложи́. Ты́, оста́вив тле́нный вене́ц ца́рства земна́го, избра́л еси́ безмо́лвное житие́, и ны́не пра́ведно венце́м нетле́нным увенча́нный на Небесе́х ца́рствуеши, исхода́тайствуй и на́м, смире́нно мо́лим тя́, житие́ ти́хое и безмяте́жное, и к Ве́чному Ца́рствию ше́ствие неукло́нное твои́м предста́тельством устро́й на́м. Предстоя́ же со все́ми святы́ми Престо́лу Бо́жию, моли́ся о все́х правосла́вных христиа́нех, да сохрани́т и́х Госпо́дь Бо́г Свое́ю благода́тию в ми́ре, здра́вии, долгоде́нствии и вся́ком благополу́чии в должа́йшая ле́та, да при́сно сла́вим и благослови́м Бо́га в Тро́ице Святе́й сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Молитва святому великомученику Георгию Победоносцу

Святы́й, сла́вный и всехва́льный великому́чениче Гео́ргие! Со́браннии во хра́ме твое́м и пред ико́ною твое́ю свято́ю покланя́ющиися лю́дие мо́лим тя́, изве́стный жела́ния на́шего хода́таю: моли́ с на́ми и о на́с умоля́емаго от Своего́ благоутро́бия Бо́га, да ми́лостивно услы́шит на́с, прося́щих Его́ благосты́ню, и не оста́вит вся́ на́ша ко спасе́нию и житию́ ну́ждная проше́ния; и па́ки припа́дающее мо́лим тя, свя́тый Победоно́сче, укрепи́  да́нною тебе́ благода́тию во бра́нех правосла́вное во́инство, рзруши́ си́лы возстаю́щих враго́в, да постыдя́тся и посра́мятся, и де́рзость и́х да сокруши́тся, и да уве́дят, я́ко мы́ име́ем Боже́ственную по́мощь: и все́м в ско́рби и обстоя́нии су́щим многомо́щное яви́ свое́ заступле́ние. Умоли́ Го́спода Бо́га, всея́ тва́ри Созда́теля, изба́вити на́с от ве́чнаго муче́ния, да всегда́ прославля́ем Отца́ и Сы́на и Свята́го Ду́ха, и твое́ испове́дуем предста́тельство, ны́не и при́сно и во ве́ки веко́в. Ами́нь.

Молитва великомученику Димитрию Мироточивому, Солунскому

Свя́тый и сла́вный великому́чениче Христо́в Дими́трие, ско́рый помо́щниче и те́плый засту́пниче с ве́рою притека́ющиx к тебе! Предстоя́ со дерзнове́нием Небесному Царю́, испроси́ у Него́ проще́ние согреше́ний на́ших, и о еже изба́витися нам от всегуби́тельныя я́звы, тру́са, пото́па, огня́, меча́ и ве́чныя ка́зни. Моли́ бла́гость Его, еже уше́дрити град сей, оби́тель сию́ и вся́кую страну́ христиа́нскую. Исхода́тайствуй у Царя́ ца́рствующих стране́ на́шей Росси́йстей мир, тишину́, тве́рдость в ве́ре и преспе́яние во благоче́стии; нам же, чту́щим честну́ю па́мять твою́, испроси́ благода́тное укрепле́ние на дела́ блага́я, да благоуго́дное Влады́це на́шему Христу́ Бо́гу зде творя́ще, сподо́бимся моли́твами твои́ми насле́довати Ца́рствие Небе́сное для ве́чнаго прославле́ния Его, со Отце́м и Святы́м Ду́хом, во веки веко́в. Ами́нь.

Молитва святому великомученику и страстотерпцу царю Николаю

О, святы́й страстотерпче царю́-му́чениче Нико́лае, пома́занника Своего́ тя Господь избра́, во еже ми́лостивно и пра́во суди́ти лю́дем твои́м, и храни́теля царства правосла́внаго бы́ти: ца́рское служе́ние сие́ и о душа́х попече́ние со страхом Божиим соверша́л еси́. Испыту́я же тя, я́ко зла́то в горни́ле, ско́рби го́рькия Госпо́дь ти попусти́, я́ко же Ио́ву многострада́льному, последи́ же престо́ла ца́рскаго лише́ние и му́ченическую сме́рть посла́ ти. Вся сия́ кро́тко претерпе́вый, я́ко и́стинный раб Христо́в, наслажда́ешися ны́не вы́шния сла́вы у Престо́ла всех Царя́ ку́пно со святы́ми му́ченики: свято́ю цари́цею Алекса́ндрою, святы́м царе́вичем Алекси́ем, святы́ми царе́внами О́льгою, Татиа́ною, Мари́ею и Анастаси́ею и с ве́рными слуги́ твои́ми. Но я́ко име́я дерзнове́ние ве́лие ко Христу́ Царю́, Его́же ра́ди и пострада́, моли́ с ни́ми, да отпу́стит Госпо́дь грех наро́да, не возбрани́вшаго убие́ние твое́, царя́ и пома́занника Бо́жия, да изба́вит Госпо́дь стра́ждущую страну́ Росси́йскую от лю́тых безбо́жник, за грехи́ на́ша и отступле́ние от Бо́га попу́щенных, и возста́вит престо́л правосла́вных царе́й, нам же пода́ст грехо́в проще́ние и на вся́кую доброде́тель наста́вит нас, да стя́жем смире́ние, кро́тость и любо́вь, и́хже сии́ му́ченицы яви́ша, да сподо́бимся Небе́снаго Ца́рствия, иде́же ку́пно с тобо́ю и все́ми святы́ми новому́ченики и испове́дники росси́йскими просла́вим Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь

Молитва святому великомученику Феодору Стратилату

О свя́тый, сла́вный и всехва́льный великому́чениче Фео́доре Стратила́те! Со́брании днесь во хра́ме и пред ико́ною твое́ю свято́ю покланя́ющиеся лю́дие мо́лим тя, изве́стный жела́ния на́шего хода́таю: моли́ с на́ми и о нас умоля́емаго от Своего́ благосе́рдия Бо́га, да ми́лостивно услы́шит нас, благосты́ни у Него прося́щих, и вся на́ша ко спасе́нию и житию́ ну́жная проше́ния да испо́лнит, да да́рует же побе́ду на сопроти́вныя, и страну́ на́шу в ми́ре сохрани́т. Еще́ же мо́лим тя, святы́й победоно́сче Фео́доре Стратила́те: укрепи́ да́нною тебе́ благода́тию во бра́нех правосла́вное во́инство на́ше, разруши́ си́лы возстаю́щих на ны́ враго́в, да постыдя́тся и посра́мятся от лица́ ве́рных, и де́рзость их да сокруши́тся, и да уве́дят, я́ко при́сно Боже́ственную по́мощь има́мы. Та́кожде и всем, в ско́рби и обстоя́нии су́щим, многомо́щное твое́ яви́ заступле́ние. Умоли́ же Го́спода Бо́га, всея́ тва́ри Созда́теля, изба́вити нас от ве́чнаго муче́ния, да всегда́ прославля́ем Отца́ и Сы́на и Свята́го Ду́ха, и твое́ испове́дуем предста́тельство, ны́не и при́сно, и во ве́ки веко́в. Ами́нь.

Молитва святому праведному болярину Феодору, адмиралу флота Российского, Непобедимому

Прини́кни, пра́ведне во́ине Фео́доре, с го́рних селе́ний на притека́ющих к тебе́, и вонми́ моле́нию их: умоли́ Го́спода Бо́га, дарова́ти всем нам, е́же ко спасе́нию на́шему мы про́сим от Него́ при святе́м твоем предста́тельстве. Ты вели́кое, возло́женное на тя служе́ние тща́тельно проходи́л еси́, и нас твое́ю по́мощию пребыва́ти коего́ждо, в не́же призва́н есть, наста́ви. Ты, победи́в супоста́тов мно́жества, и на нас ополча́ющихся всех ви́димых и неви́димых враго́в низложи́. Испроси́ у Всеми́лостиваго Бо́га: стра́ждущую страну Росси́йскую от лю́тых безбо́жник и вла́сти их да свободи́т, и да восста́вит престо́л правосла́вных царе́й. Умоли́ Го́спода Бо́га дарова́ти кре́пкий и ненаруши́мый мир, и зе́мли плодоно́сие, па́стырем святы́ню, зако́ном пра́вду и си́лу, военача́льником му́дрость и до́блесть непобеди́мую, градонача́льником суд, фло́ту твоему́ Росси́йскому и всему́ во́инству на́шему пре́данность ве́ре и Оте́честву, и неодоли́мое му́жество, всем же правосла́вным христиа́ном здра́вие и благоче́стие. Сохраня́й страну́ на́шу Росси́йскую и оби́тель сию́ святу́ю от всех наве́тов вра́жиих, да сло́вом и де́лом прославля́ется в них всесвято́е имя Отца́, и Сы́на, и Свята́го Духа, ныне, и при́сно, и во ве́ки веко́в. Ами́нь.

Молитва святой равноапостольной первомученице Фекле

О свята́я уго́днице Бо́жия, равноапо́стольная первому́ченице Фе́кло! По́двигом до́брым подвиза́вшися на зе́мли, восприя́ла еси́ на небесе́х вене́ц пра́вды, его́же угото́вал есть Госпо́дь всем лю́бящим Его. Те́мже взира́юще на святы́й твой образ, ра́дуемся о пресла́внем сконча́нии жи́тельства твоего́ и чтем святу́ю па́мять твою. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́ о е́же прости́ти нам вся́кое прегреше́ние и помощи́ нам проти́ву ко́зней диа́вольских, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, аще и недосто́йни есмы́, ви́дети блага́я на земли́ живы́х, сла́вяще Еди́наго во святых Свои́х сла́вимаго Бо́га, Отца́ и Сы́на и Свята́го Ду́ха, ны́не и присно, и во ве́ки веко́в. Ами́нь.