Начало к молитвам

Сла́ва Тебе́, Христу́ Бо́гу Моему́, не погуби́вшему мя гре́шнаго со беззако́ньми мои́ми, но да́же досе́ле грехо́м мои́м потерпе́вшему. (Поклон)

Сподо́би, Го́споди, в день сей без греха́ сохрани́тися нам; да́руй ми, Го́споди, да ни сло́вом, ни де́лом, ни помышле́нием прогне́ваю Тя, Созда́теля моего́, но вся́ дела́ моя́, сове́ты и помышле́ния да бу́дут во сла́ву Пресвята́го и́мени Твоего́. (Поклон)

Бо́же, ми́лостив бу́ди мне, гре́шному, во все́й жи́зни мое́й: во исхо́де мое́м и по кончи́не мое́й не оста́ви мене́. (Поклон)

Сие, падши ниц на земли, глаголи:

Го́споди Иису́се Христе́, Сы́не Бо́жий, приими́ уме́ршаго мя душе́ю и умо́м. Приими́ мя гре́шнаго, блудника́, скве́рнаго душе́ю и те́лом. Отыми́ неприя́знь безсту́дную и не отврати́ лица́ Твоего́ от мене́, не рцы, Влады́ко: «Не вем, кто еси́», но во́нми гла́су моле́ния моего́; спаси́ мя, я́ко име́яй мно́жество щедро́т и не хо́щеши сме́рти гре́шника; не оста́влю же Тя, Созда́теля моего́, и не отступлю́ от Тебе́, до́ндеже послу́шаеши мя и да́си всем грехо́м мои́м проще́ние, моли́тв ра́ди Пречи́стыя Ма́тери Твоея́, предста́тельства Честны́х Небе́сных Сил безпло́тных, свята́го сла́внаго А́нгела храни́теля моего́, Проро́ка же и Предте́чи и Крести́теля Иоа́нна, богоглаго́ливых Апо́стол, све́тлых и добропобе́дных му́чеников, преподо́бных и богоно́сных оте́ц на́ших и всех Твои́х святы́х, поми́луй и спаси́ мя гре́шнаго. Ами́нь.

Молитва Святому Духу

Царю́ Небе́сный, Уте́шителю, Ду́ше и́стины, И́же везде́ сы́й и вся́ исполня́яй, Сокро́вище благи́х и жи́зни Пода́телю, прииди́ и всели́ся в ны́, и очи́сти ны́ от вся́кия скве́рны, и спаси́, Бла́же, ду́ши на́ша.

Трисвятое

Святы́й Бо́же, Святы́й Кре́пкий, Святы́й Безсме́ртный, поми́луй нас. (Читается трижды, с крестным знамением и поясным поклоном.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Молитва Господня

О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго. Я́ко Твое́ есть Ца́рство и си́ла и сла́ва во ве́ки. Ами́нь.

Богородице Дево, радуйся

Богоро́дице Де́во, ра́дуйся, благода́тная Мари́е, Госпо́дь с Тобо́ю, Благослове́нна Ты в жена́х и благослове́н Плод чре́ва Твоего́, я́ко Спа́са родила́ еси́ душ на́ших.

Молитва

О, Ма́ти Милосе́рдая, Де́во Мари́е, аз гре́шный и непотре́бный раб Твой, воспомина́ющи Твоя́ боле́зни¹, егда́ Ты услы́шала от Симео́на Проро́ка о неми́лостивном убие́нии Сы́на Твоего́, Го́спода на́шего Иису́са Христа́, приношу́ сию́ Тебе́ моли́тву и Арха́нгельское обра́дование, приими́ в честь и па́мять боле́зней Твои́х и умоли́ Сы́на Твоего́ — Го́спода на́шего Иису́са Христа́, да да́рует ми позна́ние грехо́в и жале́ние о них. (Поклон)

Молитва 1

О́тче наш… (см. выше)

Богоро́дице Де́во, ра́дуйся… (см. выше)

О, Богоблаже́нная и Пренепоро́чная Отрокови́це, Ма́ти и Де́во, приими́ от мене́, гре́шнаго и непотре́бнаго раба́ Твоего́, сию́ моли́тву и Арха́нгельское обра́дование в честь и па́мять боле́зни Твоея́, егда́ позабы́ла Сы́на Твоего́, Го́спода на́шего Иису́са Христа́, в це́ркви и три дни Его́ не ви́дела еси́; умоли́ Его́ и испроси́ у Него́ всех грехо́в мои́х проще́ние и оставле́ние, Еди́на Благослове́нная. (Поклон)

Молитва 2

О́тче наш…

Богоро́дице Де́во, ра́дуйся…

О, Ма́ти Све́та, Преблагослове́нная Де́во Богоро́дице, приими́ от мене́, гре́шнаго и непотре́бнаго раба́ Твоего́ сию́ моли́тву и Арха́нгельское обра́дование в честь и па́мять боле́зни Твоея́, егда́ Сы́на Твоего́, Го́спода на́шего Иису́са Христа́, по́ймана и свя́зана слы́шала еси́. Умоли́ Его́, да возврати́т мне доброде́тели, че́рез грех изги́бшия², да Тя, Пречи́стая, во ве́ки велича́ю. (Поклон)

Молитва 3

О́тче наш…

Богоро́дице Де́во, ра́дуйся…

О, Милосе́рдия Исто́чниче, Де́во Богоро́дице, приими́ от мене́, гре́шнаго и непотре́бнаго раба́ Твоего́, сию́ моли́тву и Арха́нгельское обра́дование в че́сть и па́мять боле́зни Твоея́, егда́ на Кресте́ ме́жду разбо́йники ви́дела еси́ Сы́на Твоего́, Го́спода на́шего Иису́са Христа́, Его́же умоли́, Влады́чице, да пода́ст ми дар милосе́рдия Своего́ в час сме́рти моея́ и да напита́ет мя Те́лом и Кро́вию Свое́ю Боже́ственною, да Тя, Засту́пницу, сла́влю во ве́ки. (Поклон)

Молитва 4

О́тче наш…

Богоро́дице Де́во, ра́дуйся…

О, Наде́ждо моя́, Пречи́стая Де́во Богоро́дице, приими́ от мене́, гре́шнаго и непотре́бнаго раба́ Твоего́, сию́ моли́тву и Арха́нгельское обра́дование в честь и па́мять боле́зни Твоея́, егда́ ви́дела еси́ Сы́на Твоего́, Го́спода на́шего Иису́са Христа́, во гро́бе полага́ема.  Его́же умоли́, Влады́чице, да я́вится мне в час сме́рти моея́ и да прии́мет ду́шу мою́ в живо́т ве́чный. Ами́нь. (Поклон)

О, Преми́лостивая Де́во, Госпоже́ Богоро́дице, чадолюби́вая Го́рлице, небесе́ и земли́ Самодержа́вная Цари́це, любе́зная Прие́мнице всех простира́ющих к Тебе́ свои́ мольбы́, печа́льных Уте́шительнице, приими́ от мене́, гре́шнаго и непотре́бнаго раба́ Твоего́, пяточи́сленное сие́ моле́ние, в нем же воспомина́ю земны́е и небе́сныя Твоя́ ра́дости, уми́льно вопию́ща к Тебе́ си́це

Земные радости

Ра́дуйся, заче́ншая во чре́ве без се́мене Христа́ Бо́га на́шего. Ра́дуйся, во чре́ве без боле́зни носи́вшая Того́. Ра́дуйся, поро́ждшая чу́дным смотре́нием. Ра́дуйся, восприи́мшая от волхво́в‑царе́й дары́ и поклоне́ние. Ра́дуйся, я́ко обрела́ еси́ посреди́ учителей Своего́ Сы́на и Бо́га. Ра́дуйся, я́ко Рождество́ Твое́ пресла́вно из ме́ртвых воста́. Ра́дуйся, ви́девшая вознося́щагося Своего́ Созда́теля, к Нему́ же сама́ душе́ю и те́лом возшла́ еси́.

Небесные радости

Ра́дуйся, де́вства ра́ди Своего́, па́че А́нгел и всех святы́х Пресла́вная. Ра́дуйся, близ Пресвяты́я Тро́ицы просия́ющая. Ра́дуйся, Миротво́рице на́ша. Ра́дуйся, Власти́тельнице, облада́ющая все́ми Небе́сными Си́лами. Ра́дуйся, па́че всех дерзнове́ние к Сы́ну и Бо́гу Своему́ иму́щая. Ра́дуйся, милосе́рдая Ма́ти всем, к Тебе́ прибега́ющим. Ра́дуйся, я́ко Твое́ весе́лие во ве́ки не сконча́ется!

И мне недосто́йному, по нело́жному обеща́нию Твоему́, в день исхо́да моего́ ми́лостива предста́ни, да Твои́м руково́дством упра́влен бу́ду к го́рнему Иерусали́му, в нем же просла́вленно ца́рствуеши с Сы́ном Твои́м и Бо́гом на́шим, Ему́же подоба́ет вся́кая сла́ва, че́сть и поклоне́ние со Отце́м и с Пресвяты́м Ду́хом безконе́чныя ве́ки веко́в. Аминь.

От скве́рных усте́н мои́х, от ме́рзкаго се́рдца, от нечи́стаго языка́ и от души́ оскверне́нной приими́, Госпоже́ Цари́це, сие́ похвале́ние, Ра́досте моя́. Приими́, я́коже вдо́вии прия́ла сии́ две ле́пты, и да́руй ми принести́ Твое́й бла́гости дар досто́ин. О, Влады́чице моя́ Пречи́стая Де́во, Небе́сная Цари́це, я́коже хо́щеши и во́лиши, па́че же научи́ мя, что ми подоба́ет Тебе́, Ма́тери Бо́жией, глаго́лати к Тебе́ еди́ной гре́шных при́бежищу и утеше́нию. Ра́дуйся, Влады́чице, да и аз, многогре́шный раб Твой, ра́достно зову́ Тебе́, всепе́той Ма́тери Христа́ Бо́га на́шего. Ами́нь.

На Твой Пресвяты́й о́браз взира́я, я́ко и́стинную са́мую Тя зрю Богоро́дицу, ве́рою серде́чною от души́ припа́даю и поклоня́юся с Предве́чным на руку́ Твое́ю держи́мым Младе́нцем, Го́сподом на́шим Иису́сом Христо́м, боголе́пно почита́ю и молю́ Тя со слеза́ми: покры́й мя покро́вом Твои́м, от враг ви́димых и неви́димых, Ты бо род челове́ческий ввела́ еси́ в Ца́рство Небе́сное. Ами́нь.

Достойно есть

Досто́йно есть я́ко вои́стину блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.